الطبيعى يكسب

السلام عليكم

مدونتى وحشتنى اوى بس هانعمل ايه الظرووف

الحمد لله الايام دى الافراح والخطوبات عندنا كتير

واللى ملحظاة ان الواحدة لما العريس يكون جاى يشوفها اول مرة يا سلااااام تروح للكوافير وتعمل ميك اب حتى لو هى مش بتعمل اصلا وتكون واحدة تانية خاااالص بمعنى الكلمة السمرا بيضة والى عنيها سودة تتحول لازرق او اخضر حاجات كدة عجيبة

بس انا اعتقد ان اكتر مرة المفروض البنت متحطش فيها ميك اب هى اول مرة خطيبها يشوفها فيها

ودة لانها هاتعيش معاة بقية عمرها الجاى فمش معقول هاتفضل تحط الميك الصبح وبالليل وهاتفضل طول عمرها بالميك اب او هاتقل فى نظرة لو شافها من غير ميك اب

افتكر والدتى وهى بتحكيلى ان اول مرة والدى شافها فيها كان جاى لهم فى البيت وكانت لسه متوضية ومصلية المغرب

عجبنى اوى الموضوع دة لانى بكرة الكدب وبعتقد ان الميك اب التقيل اوى بجد كذب

ودة لانى بنت وبشوف قبل وبعد وبجد مش بصدق

ومفيش اجمل من الطبيعة وخلقة ربنا حتى لو فى عيب كفاية ان ربنا هو اللى خالق الوجة دة وكفاية انك على طبيعتك مش خايفة الميك اب يروح او يبوظ ومنظرك يكون وحش

حقيقى على رأى المثل الطبيعى يكسب