دمياط الجديدة

دمياط الجديدة

الايام دى بروح دمياط الجديدة كتير

ورغم حرارة الجو الا ان الطريق من دمياط لدمياط الجديدة حقيقى سااااااااحر

خضرة وزرع وسما صافية وهوا نقى ونخل طول الطريق والطيور البيضا فى الحقول الصبح بتبقى عاملة زى الؤلؤ بالضبط بتشع نور

بجد طريق رائع مع ان ناس كتيرة بتشوفة طريق طويل ومتعب لكن جمال النخل والزرع والهوا الصافى اللى جامع بين هوا الصحرا وهوا البحر وهوا الخضرة الواسعة جدااااا

تخيلوا الهوا يكون نقى وجميل ازاى

وطبعا بتمر على الميناء وهى برضة جميلة

ولما بندخل دمياط الجديدة بصراحة انا معجبة بالمدينة دى جدا جدا واتمنى اعيش فيها لانها رائعة نظيفة جميلة واسعة مبنية صح من الاول وعلى اسس وقوانين والبنية التحتية بتاعتها كويسة جدا ومتوصل الغاز من قبل لما يرصفوا الشوارع مش زى عندنا فى دمياط كل شوية يوصلوا غاز لمنطقة يبهدلوها الا مناطق معينة لازم تكون دايما مرصوفة وكويسة

كانت زمان المدينة دى زى الاشباح محدش بيروحها كتير بس دلوقتى فيها اسكان مبارك وفيها مناطق جميلة جدا ومواصلات ومرافق ممتازة

وحديقة دولية كبيرة

وكمان طراز المبانى والفلل هناك روعة بجد والوانها تجنن والشوارع واسعة جدا جدااااا

والاجمل انها هادية بدرجة كبيرة جدا يعنى عندنا فى منطقتنا فى دمياط القديمة الساعة 4 الفجر الناس صاحية والشارع دوشة جدا

هناك ممكن تستمتع بالهدوووووووء والصمت

وطبعا هى كمكان سكنى رائع جدا وصحى وجميل وكمصيف برضة حلوة بس محتاج يكون معاك عربية افضل فى التنقلات

بس مش زى راس البر يعنى راس البر زحمة ودوشة وناس ومتاطق كتير تتفسح فيها وسنيمات واسواق يعنى شبابى اكتر وعموما راس البر مش بتنام الصبح زى بالليل

لكن دمياط الجديدة جمال راقى وهدوء واشجار وصوت عصافير وهوا جميل ونقى وبحر صافى ومش مزدحم نهائى يعنى للاستجمام وللكبار اكتر منها للشباب

بحس انها مدينة رومانسية جدا يعنى شوارعها جميلة وفاضية وقدام كل بيت لازم مساحة خضرة كبيرة والشوارع واسعة جدا والجو حلو تجرى بقا تلعب تعمل اللى انت عايزة براحتك

ومستقبلها الصناعى كويس جدا لان فيها منطقة صناعية روعة وفيها مصانع عالمية والميناء قريبة منها جداااا يعنى مش بتتكلف فلوس كتير للشحن وكدة

وكمان هاتبقى حاجة تانية خالص لما تتبنى فيها جامعة دمياط قريب ان شاء الله وهما هايعملوها جامعة تكنولوجية ومش هايبقى فيها غير الكليات اللى دمياط محتاجاها فعلا زى الهندسة ومش بكل اقسامها بالاقسام اللى محتاجنها بس

بجد نفسى اعيش فى دمياط الجديدة