حزينة عليكوا يا شباب الاسلام

حفلة تامر حسنى فى المغرب

من كام ساعة وانا بقلب فى التلفزيون شفت اول جزء من الفيديو دة ( حفلة تامر حسنى فى المغرب ) بصراحة انا مكنتش مصدقة

ومازلت مش مصدقة وحسيت ان قلبى بيوجعنى لما شفت الشباب وللاسف ( البنات ) بيجروا ورا عربية تامر حسنى بكل سرعتهم علشان يلحقوة لدرجة ان الشرطة بتحمية منهم دة غير البودى جاردز اللى تبع تامر ولما جة ينزل البنات تجرى عليه ........ايه اللى بيحصل دة؟ فعلا بجد ؟

وكمية الناس الرهيبة اللى كانت بتحضر الحفلة انا عارفة ان الحفلات دى كتير بس انا غالبا مش بتفرج عليها علشان دمى ميتحرقش

بس انا دمى محروق على الاسلام على البلد على العرب وشباب العرب والمسلمين

ايه التفاهة والهيافة دى

مع احترامى لتامر حسنى بس هو مين يعنى علشان يتعمل له كدة؟

هو بيعمل افلام فيها كمية تفاهة وخروج عن الدين بطريقة غبية زى فيلم عمر وسلمى بجزئينة هو بيتدنى باسلوب الغناء وبكلمات الاغانى

انتوا لو شفتوا كمية الناس اللى حافظة اغانية ومنظر وجوة الشباب وخصوصا البنات وهى بتقول وراة

هو الحياء راح فين؟

لاء فعلا فين الحياء فين البنت اللى لما كان حد يبصلها تتكسف ووشها يحمر زى ما ربنا خلقنا

انا بجد عقلى هاينفجر ودمى بيغلى

هى دى البنات اللى هايبقوا امهات الجيل الجاى؟

حقيقى انا حزينة حزينة على الشباب

اهدى العروبة دمائى

فدائى فدائى فدائى فدائى

اهدى العروبة دمائى

واموت اعيش ميهمنيش...... اموت اعيش ميهمنيش

وكفاية اشوف (علم العروبة) باقى

علم العروبة باقى

لو مت يا امى ما تبكيش ........راح اموت علشان بلدى تعيش

لو مت يا امى متبكيش .......راح اموت علشان بلدى تعيش

افرحى يا اما وزفينى وبيوم النصر افتكرينى

وان طالت يا اما السنين خلى اخواتى الصغيرين

وان طالت يا اما السنين خلى اخواتى الصغيرين يكونوا زيي يكونوا زيي يكونوا زيي...... فدائيين فدائيين يا اما

فدائى فدائى فدائى فدااااائى

اغنية اكتر من رااائعة للراحل عبد الحليم

عندما اسمعها استكنر كلمة ( العروبة ) و( علم العروبة ) من امتى مسمعناش الكلمة دى

يعنى ايه اصلا العروبة

عارفين يعنى كلنا ( عرب ) اخوات مفيش مسلم او مسيحى

كان فى شئ بيجمعنا

دلوقتى تقريبا مفيش حاجة بتجمعنا غير حفلات عمرو دياب وتامر حسنى

هو دة المكان الوحيد اللى بتسمع صوتنا كلنا مع بعض وبصوت عالى

هو دة المكان اللى بتكون الايدين مع الايدين وكلنا حافظين شئ واحد بنقولة بصوت عالى

للاسف الشديد وهو دة المكان اللى لو ناس كتير جدا قلنالهم تروحوا دلوقتى مش هايترددوا ثانية

ولو جيت تسأل اى حد دلوقتى يعنى ايه عروبة ؟؟؟ بعد قدر من الضحك والاستهزاء لا بأس به هايقولوا ياااااااة دة انت قديم اوى يا ابنى عروبة مين يا عم .........مهزلة

اسأل اى شاب عن اخر موضة فى الشعر او فى الهدوم عن اخر شريط لعمرو دياب وعن تاريخ حياة تامر حسنى وغيرهم تلاقى جواب مفصل عنهم مش الكينج يا عم

*******

وفى ذكرى مرور 36 سنة على نصر 6 اكتوبر73

مش عارفة يا ترى فى امل...... فى امل ان الروح دى ترجع تانى

روح الوطنية وحب الوطن والتضحية علشانة

اللى خلانا ننتصر اولا نصر ربنا ثانيا الروح القوية جدا والاصرار والتخطيط والادارة والتضحية بكل شئ علشان حاجة واحدة بس ( علشان مصر ) ام الدنيا

منكرش ان فى ناس كتير جدا تتمنى تضحى بدمها دلوقتى علشان دينها وبلدها ناس فعلا كتير

لكن للاسف البلد دى ينطبق عليها مثل ( حاميها حراميها ) واللى بيدخل مناصبها الكبيرة وهو نظيف ومؤمن بمبادئ بيخرج منها بايع كل مبادئة او بالادق مش بيخرج منها اصلا

بس فى شئ بقى بيرعبنى كل لما افكر فيه

اختفاء وطنية الشباب ) وبصراحة مش عارفة اقول حاجة لان دة بقا واقع)

محدش يقدر ينكرة وان مقدار التفاهة زاد اوى عند الشباب وكمان الاستهتار بالبلد وللاسف الشديد فى شباب كتير بقت بتكرة مصر تقولك هما ادولنا ايه

من كام شهر ابن عمى راح الجيش طبعا بعد العذاب المهين اللى شافوة احنا مش بنقول متدربهمش بس على الاقل وفر ليهم خدمة صحية وغذائية مناسبة

بصراحة ابن عمى بيقول انا لو اسرائيل حاربت مصر انا هاحارب مع اسرائيل

بصراحة الكلمة دى تعبتنى اوى وخصوصا انه مكنش بيقولها باستهزاء

مش عارفة ليه مصر بتعمل كدة فى شبابها

يمكن لان الفردية بقت سمة المجتمع يعنى بقا كل واحد يقول نفسى وبس

لكن لما تختفى الصفة دى ونحب بعض بجد ونرجع تانى نتعامل بالدين لانى فعلا مؤمنة ان ( الاسلام هو الحل ) بعيدا عن الاخوان طبعا

لما نرجع تانى نخلى الدين هو اساس التعامل ما بينا ساعتها هانكون احسن

وانا ان شاء الله حاسة ان فى امل بالرغم من التفاهة اللى سائدة فى المجتمع دلوقتى الا انى شايفة ان فى بنات وشباب كتير جدا وعلى مستوى عالى من الاخلاق والتفكير عندهم اصرار يكونوا احسن ويربوا فى اولادهم حب البلد والاصرار على توحيد المسلمين

يارب يكون قريب

Excellent

ايمان : " ليه ترضى تكونى التانية لما ممكن تكونى الاولى "0

كلمات قالتها لى ( ايمان ) من اوائل المتخرجين من كليتى الجميلة

وحقيقى اثرت فى كثيرا

فلماذا ارضى بمراكز اقل حينما يكون فى استطاعتى ان اكون فى المركز الاول

ولماذا الاستسلام بالامر الواقع ان كان هناك من لا يكون مشاريعهم بمجهودهم الخالص

فانا افخر بمجهودى واراهن على فكرى

فلا استسلم ابدا لفكرة ان المراكز الاولى محجوزة مسبقا

فمن الذى زرع هذة الفكرة التى ليس لها اى اساس من الصحة فى عقلى ؟؟

هل هو نوع من انواع تبرير التقصير فى العمل

لا انكر انى الحمد لله اعمل بجد وانى احب دراستى ولكنى لا انكر ايضا انه ينقصنى بعض المهارات

مثل ( كيفية عمل ابحاث جيدة منظمة - كيفية تقديم الشغل - كيفية الاخراج الجيد والتواصل مع الدكاترة) وهذا ما سأحاول التغلب عليه هذا العام بأذن الله

دعواتكم لى

يارب هب لى علما وحكمة وايمان وتقوى ويقين وثبات وعزيمة واصرار على فعل كل ما تحبة يا كريم

بين الالم والامل نعيش

لا تيأسوا فان مع العسر يسر

قال د. القرضاوي: إن "القضية الفلسطينية تمر بمرحلة خطيرة هذه الأيام، لدرجة أن البعض قد بدأ ييأس من أن تحل، وبينما يزداد الصهاينة تكبرا نزداد نحن استسلاما حتى كاد البعض أن يقنط، وهو أمر غاية في الخطورة، لأن اليأس يورث العجز، ولا ينبغي للمؤمن أن ييأس لأن قدرة الله لا يعجزها شيء، والليل مهما طال لابد له من فجر، وجذوة الأمل لابد أن تظل مشتعلة في نفس المؤمن".

وأضاف أن "محاربة اليأس وطرده من الأمة مهمة يقع عاتقها على الدعاة والإعلاميين، فمشكلتنا الكبرى هي أننا نحتج بصوت خافت لا يسمعه الناس في الوقت الذي تضرب فيه السهام داخل صدورنا وأعماقنا، والموت أهون علينا من الوصول إلى هذه الدركة من الهوان"، مشددا على أنه "لا يجوز للأمة أن تسكت عما يجري لمقدساتها التي تهان وتداس، فإما حياة حرة أو موت في سبيل الله".

وعن تخاذل بعض الحكام العرب عن نصرة القدس والأقصى، قال د.القرضاوي: إن "الأمة الإسلامية لا تزال بخير، وإذا كان الأمل قد فقد في بعض الأنظمة العربية الحاكمة فإنه لا يمكن أن نفقد الأمل في الشعوب التي تتشوق للجهاد والاستشهاد".

وأردف أن "الشعوب العربية والإسلامية صاحبة بطولات عظيمة على مدار التاريخ، ويكفي ما قام به شعب غزة في الحرب الأخيرة مع الكيان الصهيوني؛ حيث قاوم دولة نووية لا تستحي من استعمال الأسلحة المحرمة ضد المدنيين، ورأينا في أهلنا وإخواننا بغزة الثبات والصبر على الحصار والجوع".

وهل يعقل؟؟؟

الاحتلال يطوق الاقصى ويغلق مداخلة

نص تقرير جولد ستون

تقرير جولدستون

السلطة تتنكر لتقرير جولدستون

الاتهامات تنهال على الرئيس الفلسطينى

اليهود هددوا عباس بفضحه بنشر تسجيلات تثبت تورطه بحرب غزة دفعته لسحب تقرير "غولدستون"

لا حول ولا قوة الا بالله العلى العظيم

هل يعقل ان يكون رئيس البلد متورط فى حرب شرسة دموية لا انسانية على بلدة؟

اشعر اننا فى نهاية العالم

فلم اسمع ابدا عن مثل هذة الخيانة الرهيبة فى حرب فظيعة صب فيها العدو الرصاص والقنابل الفسفورية الحارقة صبا على رؤوس الشعب

اين المرؤة ؟ اين حب الوطن؟ اين الانسانية؟

ولمن نسى هذة الحرب فليطالع متحف هولوكوست فلسطين

وهل يمكن ان ندين المحتل على هذة الحرب الشرسة وواحد من محرضى الحرب هو الرئيس المقال؟

فللعدو كل الحق ان يقتل ويشرد ويسفك دماء شعب يحرضه رئيسهم على هذا؟

اذا ثبت ان الرئيس المقال محمد عباس مشترك بشكل اساسى فى هذة الحرب الوحشية فليحتمل جزاء فعلته فى الدنيا والاخرة

قلبى يتقطع الما على الشعب الفلسطينى الغلبان معظمه منقسم وقادتة يقتلون فى بعضهم ومنهم الخونة وهم من يحتملون نتائج كل هذا

يالهى كن مع اخوتى وثبتهم وانصرنا وطهرنا من الخونة يا كريم

يارب وحد المسلمين وانصرهم وثبت اخواننا المجاهدين فى الاقصى وثبت الارض من تحت الاقصى الاسير يا كريم

وارزقنا بمن يوحد صفوفا يارب

سوى رضاك لا اريد

حين ولدت اعطيتنى قلبا صغيرا خاليا

ملأتة حبا لك حبا نقيا صـــــــــــــافيا

انت حبيبى ومالكى حبك فى قلبك يزيد

يا من يسرنى قربك سوى رضاك لا اريد

قلبى بذكرك يطمئن يدعوك ربى العاليا

سبحانك وبحمدك يرجوك عفوا وعافية

شكرا لما اهديتنى قلبا بذكرك يخشع

ثبته ربى بفضلك حتى يطيع ويسمع

عفوااااااا لقد نفذ رصيدكم

عفوا لقد نفذ رصيدكم

الكلمة دى بتتردد اوى فى دماغى الايام دى

عارفين لما يكون فى قلبك رصيد حب كبير جدا لشخص ما والشخص دة يربطك بيه علاقة عائلية قوية جدا وان من المفترض منك انك تحب الشخص دة على طول

وانت فعلا بتحبة بس للاسف بتصرافتة تخليك متحبوش وتتغير من ناحيتة تغيير للاسوأ

وللاسف انا مش عارفة انصحة ومش عارفة اقولة اننا بنحبك اوى لكن انت عايز تكرهنا فيك وانت مش عارف حاسة انك دلوقتى شبة الصورة دى عينيك متغطية ومش شايف انت بتعمل فى علاقتك بينا كلنا ايه

ربنا يهديك ياللى فى بالى يارب ويبعد عن العصيبة والنرفزة اللى بتخلى الناس تزعل منك ويبعد عن الشياطين يارب

i am??????

طول عمرى وانا بفكر كتير اوى وبحاول احسن من شخصيتى

وساعات وانا صغيرة لما الاقى واحدة مثلا شاطرة اقوم اعمل زيها

لما الاقى واحدة هادية احاول اوى اقلدها وهكذا فى كل الصفات والمرحلة دى غالبا كانت فى فترة اعدادى

لحد لما فى مرة وانا بفكر حسيت انى اجمل شئ انى اكون انا

انى اكون دينا وبس

وان فيا صفات كتير حلوة فى مقابل الصفات السيئة

وان كل انسان بيكون ليه شخصيتة المميزة ؟

وكل انسان فيه صفة جميلة اوى هى اللى بتميزة عن غيرة

من يومها وانا عرفت ان الانسان لما يشوف صفة حلوة فى حد تانى مش يقلد شخصيتة كلها

لاء يحاول يدور على الصفة الجميلة دى فى شخصيتة وينميها

انا دايما اؤمن بمبدأ ان مفيش شخص ممكن يكون كلة وحش ومفيش شخصيتين متضادتين

لاءن اكيد اكيد فى مساحة مشتركة بينهم فى الافكار

ودايما لما اعرف ان فى حد وحش جدا مع انى اثق كل الثقة ان الانسان دة تصرفاتة سيئة مش بقدر اخد انطباع انه انسان سئ مش عارفة ليه ودة فعلا شئ وحش

فى خلال حديث مع واحدة صاحبتى كنت بسألها عن عيوبى

قالتلى ان من احد عيوبى انى طيبة

بس فى انواع من الطيبة يعنى ممكن يكون انسان طيب جدا بس بيعرف ياخد حقة كويس ويزعل وياخد موقف جدى من الناس اللى مزعلاة

انا للاسف مش من النوع دة خالص ودة شئ بيتعبنى جدا

وعارفين لما بزعل من حد باخد جمب وبس مع انى المفروض اناقش صاحبتى دى مثلا عملت كدة ليه

ويمكن دة لانى واثقة ثقة مطلقة انى لو كلمتها مع اول كلمة هاقول كل اللى فى قلبى ليها وهسامحها وهاعيط واخد صاحبتى فى حضنى واقولها احنا ملناش غير بعض ويبقى ولا كأن شئ حصل مع انى المفروض اخد موقف من اللى حصل

وعلشان كدة لما بكون زعلانة اوى من حد مش بكلمة خالص وبحاول اتجنب فتح اى حديث معاه علشان مصالحوش

ودى فعلا مشكلة كبيرة انى مش بقدر اتحكم فى قلبى واقوله ابعد عن صاحبتى دى مثلا لانها بتزعلنى وبرضة مقدرش اقول انا بكرة فلان ممكن اقول الكلمة بلسانى لكن فعلا بقلبى انا مش بقدر اكره حد

منكرش ان تصرفاتى وطيبتى على قد ما هى بتتعبنى على قد ما هى بتصلح من شخصية اللى قدامى

وبرضة من عيوبى انى مترددة جدااا

يعنى ساعات اكون عارفة انى بعمل شئ غلط وانا عايزة اتغير لكن مترددة اتغير

وساعات بحس ان ربنا زعلان منى اوى علشان ربنا مش عايزنى اسلك الطريق دة بس انا مكملة فيه لكن حقيقى لما بفكر ليه ربنا حطنى فى الموقف دة بلاقى انة عايزنى اكون اقوى واتعلم من الخطأ دة ومكرروش ابدا ويكون نقطة نهاية علشان نبدأ من اول السطر

مع ان انا برضة ساعات فى قضايا محدش يقدر ياخد فيها قرار بيكون ليا رأى وقرار حاسم ونهائى

انا حقيقى مش عارفة انا ليه كدة بس رغم كل سلبيات شخصيتى وانى بزعل كتير اوى من نفسى بس انا فى الاخر بكون سعيدة انى مش شايلة فى قلبى حاجة من اى حد وانى بحب الناس كلها

ويارب اقدر اغير من عيوبى واكون شخصية قوية واقدر فعلا اتغير للاحسن