السلام عليكم
حسب دراستى كان فى سكاشن عن الفن المعمارى والتصميم الداخلى والاثاث الاسلامى وكنا بناخد سكاشن هناك
حقيقى اول لما شفت المسجد دة حبيتة بطريقة غريبة وحسيت انى بجد رجعت للعصر دة اللى انا بحبة جدااااا و مع انى رحت مسجد الرفاعى برضة بس حسيت انة مقبض مش مريح
لكن حقيقى لما رحت كانت تعبيرات وجهى مليانة بالفخر والزهو والحب حبيت المكان جدا وخصوصا اننا كنا بنقعد فية اكتر من 5 ساعات متواصلة فكنا بنحضر غالبا صلاة الظهر والعصر وكمان افواج من السياح كانت بتيجى وتروح علينا طبعا كانوا بيتكلموا معانا كتيير وبجد شعرت بالفخر اننا كنا محجبات وكان فينا منقبات وكنا بنشتغل ونرسم ونرفع مقاسات ونقيس مع بعض حتى هما كانوا مستغربين (انا حسيت بدة) وحسيت بجد بعظمة الحضارة الاسلامية والفن الاسلامى العريق لدرجة انى السنة دى خليت كل شغلى تقريبا طراز اسلامى علشان اتقنة اكتر واكتر
المهم المسجد دة اتبع فى حاجة اسمها البعد الرابع فى العمارة وكمان اصول العمارة الاسلامية الرائعة انها لازم ميكونش صحن المسجد مكشوف للى برة يعنى لازم يكون فى ممر منكسر بحيث انة يخبى اللى جوة عن اللى برة
والغريب وانت فى المسجد دة اللى هو اصلا موجود فى ميدان زحمة ودوشة وعربيات كتيييير انك متحسش باى صوت الا السكينة والهدوء ولا اى حركة ولا صوت اى عربية وكمان الجو الحر جدااا برة تشعر بالرطوبة والبرد الجميل جواة
يمكن علشان سمك الجدران كبير اوى والارض معظمها رخام بس حقيقى انا منبهرة بالمسجد دة وكمان منبهرة بشخصية السلطان حسن جداااا
كنت قاعدة فى القاعة الاخيرة اللى هو مدفون فيها برفع مقاسات شغل هناك وكنت ساندة ظهرى على حاجة وبتدور ببص لقتنى ساندة على قبرة طبعا هو فى خشب حول القبر بس بجد متخضيتش ولا حاجة مع انى كنت لواحدى فى قاعة كبيرة جدا وقريت لة الفاتحة اكتر من 5 مرات انة عمل شئ رائع بالاتقان دة كلة
وبمناسبة الاتقان فعلا اللى يشوف المسجد دة وكمية الرخارف والكلام وبعد الكلام دة عن الارض يعنى كانوا بيستخدموا اكيد حاجات عالية جدا علشان يوصلوا ليها يحس ليه الحضرة الاسلامية كانت عظيمة ومنتصرة دايما
لان كان فى اتقان وتحس انة اللى عمل الشغل دة بجد حد راايق جدا ونفسة صافية جدا فعلا انة يعمل شئ متقن كدة وخصوصا انة فى الفن الاسلامى مكنش فى ابدا التصوير يعنى مينفعش يحط صورة انسان او صورة وردة مجسمة علشان طبعا دة حرام فكان دة بالنسبة ليه تحدى خلاة يوصل لشئ جميل ومبتكر وخصوصا النجوم الاسلامية الرائعة اللى صعب تقعد تتعلم فيها فما بالك انها تعملها بالدقة دى يعنى انا علشان اعمل النجوم دى كنت بعملها على برنامج الاوتوكاد اسهل علشان محتاجة وقت كتير جدا انها تتعمل باتقان
وكان المفروض نعمل المشروع من مسجد السلطان حسن والرفاعى وبيت الكريتلية بس انا عملت اكتر من السلطان حسن لانى بجد حبيت المكان والحمد لله جبت امتياز فى المشروع دة
وربنا يرحمك يا سلطان حسن
.jpg)
No comments:
Post a Comment