اجمل اب فى الدنيا

السلام عليكم ورحمة الله وبركاتة

بابا

نور عيونى

بجد والدى اجمل اب فى الدنيا حنين, محترم ,طيب, متدين, كل حاجة حلوة فى الدنيا

اهم حاجة انه بيتقى ربنا فينا وبياكلنا من حلال 

كمان بار بوالدية يعنى جدتى وجدى من زمااااان وهما تعبانين رفض فى اول حياتة فرص عمل كويسه جدا علشان ميسافرش ويسيبهم 

مكناش بنروح نصيف كتير علشان منسيبهمش ولو رحنا كنا ساعات بناخدهم معانا

اكيد احنا كنا فى الاول بنتضايق من كدة

بس حقيقى والدى نجح وملى قلوبنا بحب جدى وجدتى والبر بيهم والعطف عليهم

وبقينا نفكر فى كل حاجة ليهم الاول قبلنا وحقيقى قلبنا اتملى بحبهم

مرة بابا قالى انة كل قرش اتصرف علينا حلال وانة بيشهدنا على دة

انا كنت سعيدة اوى لما عرفت دة لان من نبت من سحت فالنار اولى به

والدى ادالى حرية كبيرة جدا لدرجة انى بقيت اخاف اعمل حاجة ممكن هى فى حدود المسوح بيه بس لما يكون حد ادالك حرية وخايف انة يزعل منك بتحاول تتجنب اى شئ يزعلة

ودة علمنى انة انا مش خايفة من والدى علشان كدة مش بعمل حاجة غلط لاء انا ربنا فوقى وشايفنى وسامعنى وتانى حاجة علشان بخاف على زعله

وفى الاخر اللى يشوف حنية والدى على جدى وجدتى التعبانين وسهرة معاهم وصبرة وتعاملة معاهم بكل رحمة وحب وعمرة محش بملل او زهق من خدمتهم يحس انه اجمل انسان

 نفسى ارد الجميل دة لاجمل اب فى الدنيا

ربنا يخليك ليا يا نور عيونى